「初時」有幾初，「稍後」有幾後？ 拆解天文台預報用字
「初時」有幾初，「稍後」有幾後？今晚同晚間原來係唔同意思？！報紙成日話「離岸間中6級，風力達三號波」、「一連九日落雨」，原來只係誇大其詞，MET WARN為大家拆解各種天氣術語同誤解！
首先講一講大家最困惑嘅初時同稍後，其實呢兩個字唔係明確指示詞，唔似早上、下午有明確時段，初時同稍後分別指預報期上半段同下半段，以早上11點45分，初時同稍後分別指11:45至17:59同18:00至23:59，不過去到晚上23點15 分發出嘅天氣預報，又會變咗指00:00至11:59同埋12:00至23:59，簡單嚟講係移動龍門，可以理解為近身同遠身，不過呢個用詞係相當唔人性化，即使為咗防止天氣預報有誤差而留有後路，其實用呢類咁模糊嘅字眼都唔理想。
至於晚間、今晚同日間就直接好多，晚間指日落後至日出前，今晚指日落後至午夜前，日間則指日出後至日落前。
另一樣就同部份報章有關，我哋成日聽到「離岸間中6級，風力達三號波」、「一連9日有雨」，然後大家都會話天文台唔準，其實係因為部份報章曲解咗個預測。離岸（間中）6級指離岸吹強風，港內或普遍地區並未受強風影響，不需發出三號波！風力僅僅屬一號波級別，離岸（間中）8級亦是同樣道理，不等於八號波。
至於「一連9日有雨」大家可以參考MET WARN 早前發表的文章，由於天文台未有好似中國大陸咁將雨量分級，大家需要留意天文台所用的量詞判斷驟雨程度，天文台預測「間中有驟雨」或以上先同大家眼中耐唔耐有雨吻合，當天文台預測一兩陣驟雨同幾陣驟雨個陣，全港可能真係得幾滴雨！
部份時間有陽光同部份時間天色明朗都講見到啲太陽，不過部份時間有陽光係雲與雲之間有機會見到藍天，而部份時間天色明朗係指個天有雲，但雲層較薄，會透光。
最後講埋高空擾動同移動指示詞，高空擾動代表高空氣流有利降雨，例如西風槽槽前，同地面低壓槽係唔同！舉例，今年2月底強烈冬季季候風就伴隨高空擾動為我哋帶來持續降雨，但係個陣地面氣溫其實好低，係不利降雨，純粹係高空環境非常有利對流發展所以持續有雨。至於靠近／移近同埋移向，大家睇一睇英文版就理解到，靠近／移近叫做Edging closer to… 而移向就叫做 moving towards，舉個例子，如果一隻風喺南海北部徘徊，稍微移埋少少沿岸地區但唔上岸，我哋會用「移近」，而直接隊埋岸就會用「移向」，大家學識睇天文台嘅文字藝術就會知天文台個如意算盤係點喇。